کارل مارکس آہدے جو تاریخ اپݨے آپ کوں ݙو لِنگ دُھریندی ہے، ہک واری المیہ اتیں ٻئی واری مخول دے روپ وچ۔  کُجھ ایہا صورت آصف زرداری نال لڳدی ہے۔

جتھاں 1996 وچ اوندی گرفتاری تاریخ دا ہک المیہ ہئی، ننویں جمہوریت کیتے ہک دھچکا ہئی، جݙاں او بے نظیر بھٹو تے پیپلز پارٹی دی ہک کمزوری ہئی، آمریت پسند قوتیں دے پروپیگنڈے دی من پسند خوراک ہئی۔ کیڑھا کیڑھا الزام اوندے اُتیں نہ لڳٰیا۔۔۔ مسٹر ٹین پرسنٹ، مرتضی بھٹو دا قاتل، لوبھی، دہشت گرد تے مافیا ڈان۔

سندھو دھرتی دے ایں ٻروچ سپوت اپݨی دھرت ، دانش اتیں اٹکل نال ایں سبھ دا مقابلہ کیتا۔   یارھاں سال سخت جیل کٹی، اپݨی جبھ کپوائی، ٻال ٻچیں کنیں دوری برداشت کیتی، عدالتیں دے روز دے چکر کٹے، ہتھکڑیں کوں زیور تریور بݨایا۔ بے نظیر بھٹو دے قتل دے بے انت ݙُکھ کوں سینے دفن کیتا۔

ایں سبھ ڈکھ درد تے ݙݙھپ دے خلاف اوں انتقام دا اوھو ڈھالا ورتا جیندا سبق اونکوں بی بی گھول گھول پلا ڳئی: ” جمہوریت بہترین انتقام ہے٘”۔۔۔ اپݨی حکومت دے دور وچ اٹھارہویں ترمیم، بلوچستان حقوق پیکج، پختونخواہ دی سُنڄاݨ، سرائیکیں دے حق دی راہ پدھری کرݨ، گلگت بلتستان دی علاقائی خودمختیاری، سبھے سیاسی قوتیں نال مفاہمت، غرض اوں ہر او کم کیتا جیندے نال جمہریت ودھ تڳڑی تھئی۔ ایں سبھ پچھوں اوندا ہکو مقصد ہئی جو جمہوریت تے آمریت دے وچالے ہک ݙونگھی کھائی کھٹی ونڄے۔ اڄ آمریت پسند قوتیں دا وݙا ݙر بھئو اوں کھائی کنیں ٹپ مارݨ ہے۔

تاریخ دے ایں پھیر وچ اڄ اوندی اڄوکی گرفتاری ہک مخول بݨ ڳئی ہے٘

اے مخول ہے اوں عدالتی تے انصاف دے نظام دا جئیں اونکوں یارھاں ورھیں دی قید پچھوں بے گناہ منیا۔
اے مخول ہے اوں فیڈریشن دا جیندی علامتی زنزیز جے بے نظیر بھٹو ہئی تاں اوندی جیندی جاڳدی تجسیم تے ضمانت آصف زرداری ہے۔
اے مخول ہے اوں آئین دا جینکوں اوں اپݨےاصلی روپ بحال کیتا۔

ایں مخول پچھوں او جیتلا قید رہسی، اوتلا اوندا قد ودھسی، اوندے ویری ودھ ہیݨے تے بے وس تھیسن۔

المیہ کنیں مخول ۔۔۔۔ ایہو تاریخ دا پھیر ہوندے، ایہو تاریخ دا قانون ہوندے، ایہو تاریخ دا انتقام ہوندے۔

……

مشتاق گاڈی قائداعظم یونیورسٹی میں استاد ہیں

LEAVE A REPLY

Please enter your comment!
Please enter your name here